ನ ಹಿ ವೈರೇಣ ವೈರಾಣಿ, ಶಾಮ್ಯನ್ತಿ ಇಹ ಕದಾಚನ
ಅವೈರೇಣ ಶಾಮ್ಯನ್ತಿ ಏಷ ಧರ್ಮಃ ಸನಾತನಃ | ಧಮ್ಮಪದ, 1:5
ವೈರದಿಂದ ವೈರಗಳು ಎಂದಿಗೂ ಶಮನವಾಗುವುದಿಲ್ಲ. ಅವೈರದಿಂದ, ಅಂದರೆ ಸ್ನೇಹ ಪ್ರೀತಿಗಳಿಂದ ವೈರವು ಶಮನವಾಗುತ್ತದೆ. ಇದೇ (ಈ ಮಾರ್ಗವನ್ನು ಅನುಸರಿಸುವುದೇ) ಸನಾತನ ಧರ್ಮ.
ಕಣ್ಣಿಗೆ ಕಣ್ಣು ಅನ್ನುತ್ತಾ ದ್ವೇಷದಲ್ಲಿ ಪರಸ್ಪರ ಕತ್ತಿ ಮಸೆಯುತ್ತಿದ್ದರೆ ಲೋಕದಲ್ಲಿ ಕೊನೆಗೆ ಕುರುಡರಷ್ಟೆ ಉಳಿಯುತ್ತಾರೆ – ಅನ್ನುತ್ತದೆ ಒಂದು ನಾಣ್ಣುಡಿ. ಸೇಡು, ವೈರ ಇವು ಧರ್ಮಲಕ್ಷಣಗಳಲ್ಲ. ನಾವು ಸುಖವಾಗಿರಬೇಕು, ನೆಮ್ಮದಿಯಿಂದ ಇರಬೇಕು ಅಂದರೆ ಧರ್ಮವನ್ನು ಅನುಸರಿಸಬೇಕು. ಮತ್ತು ನಮ್ಮ ಸನಾತನ ಧರ್ಮ ‘ಅವೈರ’ವನ್ನು ಹೇಳಿದೆ. ಅದರಲ್ಲಿ ಸಂಪೂರ್ಣ ನಂಬಿಕೆಯಿಟ್ಟು, ಶ್ರದ್ಧೆಯಿಂದ ಆಚರಿಸಿದರೆ ಶಾಂತಿಯಿಂದ ತುಂಬಿದ ಸಂತಸದ ಬದುಕು ನಿಶ್ಚಿತ.