ಎಪಿಕ್ಯೂರಸ್ ತನ್ನ ಶಿಷ್ಯರಿಗೆ ಆತ್ಮಾವಲೋಕನ ಮಾಡಿಕೊಳ್ಳುವಂತೆ ಹೇಳುತ್ತಿದ್ದ. ನಮ್ಮ ಭಾವನೆಗಳು ಏನು ಹೇಳುತ್ತಿವೆ ಎನ್ನುವುದನ್ನು ನಾವು ಆಲಿಸಬೇಕು. ಆದರೆ ಅದೇ ಸಮಯದಲ್ಲಿ, ನಮ್ಮ ಸ್ನೇಹಿತರೊಂದಿಗೆ ಆಳವಾದ ಮತ್ತು ಅರ್ಥಪೂರ್ಣವಾದ ಸಂಭಾಷಣೆಗಳನ್ನೂ ನಡೆಸಬೇಕು… । ಸಂಗ್ರಹ – ಅನುವಾದ : ಚಿದಂಬರ ನರೇಂದ್ರ

ಪ್ರಾಚೀನ ಗ್ರೀಕ್ ತತ್ತ್ವಜ್ಞಾನಿಯಾಗಿದ್ದ ಎಪಿಕ್ಯೂರಸ್ ತನ್ನ ಇಡೀ ಜೀವನವನ್ನು ಒಂದು ಪ್ರಶ್ನೆಯ ಅಧ್ಯಯನದಲ್ಲಿ ಕಳೆದ. ಅದೇನೆಂದರೆ, ಕೆಲವು ಜನರು ಸದಾ ಚಂಚಲರಾಗಿಯೂ ಅತೃಪ್ತರಾಗಿಯೂ ಇರುವಾಗ, ಇನ್ನು ಕೆಲವರು ಹೇಗೆ ನೆಮ್ಮದಿಯಿಂದ ಮತ್ತು ಸಂತೋಷದಿಂದ ಬದುಕುತ್ತಾರೆ?
ನಾನು ಯಾವಾಗಲೂ ಆತಂಕಕ್ಕೆ ಒಳಗಾಗುವ ಸ್ವಭಾವದ ವ್ಯಕ್ತಿಯಾಗಿದ್ದೇನೆ. ಆದರೆ ಎಪಿಕ್ಯೂರಿಯನ್ ತತ್ತ್ವಶಾಸ್ತ್ರ ನನಗೆ ಮನಸ್ಸಿನ ಶಾಂತಿಯನ್ನು ಕಂಡುಕೊಳ್ಳಲು ನೆರವಾಯಿತು. ಅದೇ ತತ್ತ್ವಶಾಸ್ತ್ರ ನಿಮಗೂ ನೆರವಾಗಲಿ ಎನ್ನುವುದು ನನ್ನ ಆಶಯ.

ಮೊದಲನೆಯದಾಗಿ, ಫಿಲಾಸೊಫಿ ಬಹಳ ಮುಖ್ಯ
ಎಪಿಕ್ಯೂರಸ್ ತನ್ನ ಶಿಷ್ಯರಿಗೆ ಆತ್ಮಾವಲೋಕನ ಮಾಡಿಕೊಳ್ಳುವಂತೆ ಹೇಳುತ್ತಿದ್ದ. ನಮ್ಮ ಭಾವನೆಗಳು ಏನು ಹೇಳುತ್ತಿವೆ ಎನ್ನುವುದನ್ನು ನಾವು ಆಲಿಸಬೇಕು. ಆದರೆ ಅದೇ ಸಮಯದಲ್ಲಿ, ನಮ್ಮ ಸ್ನೇಹಿತರೊಂದಿಗೆ ಆಳವಾದ ಮತ್ತು ಅರ್ಥಪೂರ್ಣವಾದ ಸಂಭಾಷಣೆಗಳನ್ನೂ ನಡೆಸಬೇಕು.

ಎರಡನೆಯದಾಗಿ, ನಮ್ಮ ಬದುಕಿನ ಮೇಲಿನ ನಿಯಂತ್ರಣವನ್ನು ಮತ್ತೆ ನಮ್ಮ ಕೈಗೆ ತೆಗೆದುಕೊಳ್ಳಬೇಕು.
ನಮ್ಮ ಬದುಕಿನಲ್ಲಿ ಸಂತೋಷ ನೀಡುವ ಸಂಗತಿಗಳನ್ನು ಆಸ್ವಾದಿಸಲು ಕಲಿಯಬೇಕು. ಹಾಗೆಯೇ, ನಮ್ಮಲ್ಲಿ ಆತಂಕ ಮತ್ತು ನೋವನ್ನು ಉಂಟುಮಾಡುವ ಸಂಗತಿಗಳನ್ನು ಹೇಗೆ ಪರಿಹರಿಸಬಹುದು ಎನ್ನುವುದನ್ನೂ ಕಂಡುಕೊಳ್ಳಬೇಕು. ನಾವು ಹೆಚ್ಚು ವಿವೇಕಯುತವಾದ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಕಲಿಯಬೇಕು.

ಮೂರನೆಯದಾಗಿ, ನಮ್ಮ ಸಂಬಂಧಗಳಿಗೆ ನಾವು ಇನ್ನಷ್ಟು ಹೆಚ್ಚಿನ ಮಹತ್ವ ನೀಡಬೇಕು. ಎಪಿಕ್ಯೂರಸ್ ಹೇಳಿದಂತೆ,
“ನಿಜವಾದ ಸಂತೋಷವನ್ನು ನೀಡಲು ಜ್ಞಾನವು ನಮಗೆ ಒದಗಿಸುವ ಎಲ್ಲ ಸಂಗತಿಗಳಲ್ಲಿ, ಅತ್ಯಂತ ಶ್ರೇಷ್ಠವಾದದ್ದು ಸ್ನೇಹ.” ಸಂತೋಷದಿಂದ ಬದುಕಬೇಕಾದರೆ, ನಾವು ಆಗಾಗ್ಗೆ ಪ್ರೀತಿಸಬೇಕು ಮತ್ತು ಪ್ರೀತಿಸಲ್ಪಡಬೇಕು. ಅಂದರೆ, ಇತರರನ್ನು ಪ್ರೀತಿಸುವುದರ ಜೊತೆಗೆ ಅವರ ಪ್ರೀತಿಗೂ ಪಾತ್ರರಾಗಬೇಕು.

ಕೊನೆಯದಾಗಿ, ನಾವು ನಮ್ಮನ್ನು ತೊಡಗಿಸಿಕೊಳ್ಳುವ ಸಂಗತಿಗಳ ಸಂಖ್ಯೆಯನ್ನು ಕಡಿಮೆ ಮಾಡಿಕೊಳ್ಳಬೇಕು.
ಅತಿಯಾದ ಕೆಲಸದ ಒತ್ತಡ ಮತ್ತು ನಿರಂತರ ಓಟದ ಬದುಕಿಗೆ ವಿರುದ್ಧವಾದ ತತ್ತ್ವವನ್ನು ಪ್ರತಿಪಾದಿಸಿದವರಲ್ಲಿ ಎಪಿಕ್ಯೂರಿಯನ್ನರು ಮೊದಲಿಗರು. ಅವರು ಹೇಳಿದ್ದು ಇಷ್ಟೇ: ನಾವು ಕಡಿಮೆ ಕೆಲಸಗಳನ್ನು ಮಾಡಬೇಕು. ಆದರೆ ನಮಗೆ ಯಾವ ಕೆಲಸದಲ್ಲಿ ಸಾಮರ್ಥ್ಯವಿದೆಯೋ, ಯಾವುದು ನಮಗೆ ಸಂತೋಷ ನೀಡುತ್ತದೆಯೋ, ಅಂತಹ ಕೆಲಸಗಳನ್ನೇ ಹೆಚ್ಚು ಮಾಡಬೇಕು.

ಅಷ್ಟೇ ಅಲ್ಲ, ನಾವು ವಾಸಿಸುವ ನಮ್ಮ ಪುಟ್ಟ ಪರಿಸರದಲ್ಲಿ, ನಮ್ಮದೇ ಆದ ವಿಶಿಷ್ಟ ಛಾಪನ್ನು ಮೂಡಿಸಿದ ವ್ಯಕ್ತಿಗಳಾಗಿ ಬೆಳೆಯಬೇಕು. ನಮ್ಮ ಸುತ್ತಮುತ್ತಲಿನ ಜನರ ಮನಸ್ಸಿನಲ್ಲಿ ಒಳ್ಳೆಯ ನೆನಪಾಗಿ ಉಳಿಯುವಷ್ಟು ಅರ್ಥಪೂರ್ಣವಾದ ಬದುಕನ್ನು ಕಟ್ಟಿಕೊಳ್ಳಬೇಕು. ಇದೇ ‘The Art of Enough’

ಈ ಪ್ರಾಚೀನ, ಸಾಬೀತಾಗಿರುವ ಮತ್ತು ಇಂದಿನ ಕಾಲಕ್ಕೆ ಅತ್ಯಂತ ಅಗತ್ಯವಾಗಿರುವ ಜೀವನದರ್ಶನವು ನಿಮಗೂ ನಿಮ್ಮ ಬದುಕಿನ ಮೇಲಿನ ನಿಯಂತ್ರಣವನ್ನೂ, ನಿಜವಾದ ಸ್ವಾತಂತ್ರ್ಯವನ್ನೂ ಕಂಡುಕೊಳ್ಳಲು ನೆರವಾಗಲಿ
ಈ ಇಡೀ ಫಿಲಾಸೊಫಿಯ ಸಾರ ಒಂದೇ ವಾಕ್ಯದಲ್ಲಿ ಅಡಗಿದೆ:
ಬದುಕಿನಲ್ಲಿ ಎಲ್ಲವನ್ನೂ ಪಡೆಯುವುದೇ ಸಂತೋಷವಲ್ಲ; ನಮಗೆ ನಿಜವಾಗಿಯೂ ಬೇಕಾಗಿರುವುದು ಯಾವುದು ಎನ್ನುವುದನ್ನು ಅರಿತು, ಅದರಲ್ಲಿ ತೃಪ್ತಿಯನ್ನು ಕಂಡುಕೊಳ್ಳುವುದೇ ನಿಜವಾದ ಸಂತೋಷ.