ಜಪ, ಭಗವಂತನನ್ನು ನೆನೆಯುವ ಸುಂದರವಾದ ಸಾಧನ. ಜಪ ನಮ್ಮ ಮನಸ್ಸನ್ನು ತೈಲಧಾರೆಯಂತೆ ಜಗನ್ನಿಯಾಮಕ ಶಕ್ತಿಯಲ್ಲಿ ನೆಲೆಯಾಗಿರಿಸುತ್ತದೆ. ಇಂಥಾ ಜಪದ ಬಗ್ಗೆ ಮತ್ತು ಜಪವಿಧಾನಗಳ ಬಗ್ಗೆ ಸನಾತನ ಶಾಸ್ತ್ರಗಳು ಏನು ಹೇಳುತ್ತವೆ? ಇಲ್ಲಿ ನೋಡಿ…
ಜಕಾರೋ ಜನ್ಮ ವಿಚ್ಛೇದಃ ಪಕಾರಃ ಪಾಪ ನಾಶನಂ | ತಸ್ಮಾತ್ ಜಪ ಇತಿಪ್ರೀಕ್ತೋ ಜನ್ಮಪಾಪ ವಿನಾಶಕಃ ||
ಭಾವಾರ್ಥ: ಜ ಎಂಬ ಅಕ್ಷರದಿಂದ ಜನ್ಮದ ನಂಟು ಕಳೆಯತ್ತೆ. ಪ ಕಾರ: ಪಾಪನಾಶನಂ ಪ ಕಾರ ಪಾಪ ನಾಶ ಮಾಡುತ್ತದೆ. ಹಾಗಾಗಿ ಇದು ಜನ್ಮಪಾಪ ವಿನಾಶಕವಾದ ಪದವಾಗಿದೆ.
ಜಪವು ನಮ್ಮನ್ನು ನಿರಂತರವಾದ ಜನನ – ಮರಣ ಚಕ್ರದಿಂದ ಮುಕ್ತಗೊಳಿಸುತ್ತದೆ ಎಂಬ ನಂಬಿಕೆ ಇದೆ. ದೇಶ – ಕಾಲ ಹಾಗೂ ಅನುಕೂಲಕ್ಕೆ ತಕ್ಕಂತೆ ಹಲವು ವಿಧದ ಜಪಗಳನ್ನು ಹೇಳಲಾಗಿದ್ದು, ಅವುಗಳಲ್ಲಿ 9 ಬಗೆಯ ಜಪ ವಿಧಾನಗಳನ್ನು ಇಲ್ಲಿ ನೀಡಲಾಗಿದೆ.
ನಿತ್ಯ ಜಪ: ನಿತ್ಯವೂ ತಪ್ಪದೇ ಒಂದು ನಿಗದಿತ ಸಮಯದಲ್ಲಿ ಮಾಡುವ ಜಪ. ಇದನ್ನು ಆತ್ಮೋನ್ನತಿಯ ಮಾರ್ಗವೆಂದು ಹೇಳಲಾಗಿದೆ.
ನೈಮಿತ್ತಿಕ ಜಪ: ಇದು ವಿಶೇಷ ದಿನಗಳಲ್ಲಿ ಮಾಡುವ ಜಪ. ಸಂಕ್ರಮಣ, ನವರಾತ್ರಿ, ಶಿವರಾತ್ರಿ ಇಂಥ ಪರ್ವ ಕಾಲದಲ್ಲಿ ಮಾಡುವ ಜಪ. ಇದು ಸಾಂದರ್ಭೀಕ ಫಲವಿಶೇಷಗಳನ್ನು ನೀಡುತ್ತವೆ ಎಂದು ಹೇಳಲಾಗಿದೆ.
ಕಾಮ್ಯ ಜಪ : ಇದು ಒಂದು ನಿರ್ದಿಷ್ಟ ಅಪೇಕ್ಷೆಯಿಂದ ಮಾಡುವ ಜಪ. ಯಾವ ಬಯಕೆ ಇಟ್ಟುಕೊಂಡು ಜಪ ಮಾಡುತ್ತೇವೋ ಅದು ಫಲಿಸುವುದೆಂದು ಹೇಳಲಾಗಿದೆ.
ಪ್ರದಕ್ಷಿಣಾ ಜಪ: ದೇವಾಲಯದಲ್ಲಿ, ಅಶ್ವತ್ಥದ ಬಳಿಯಲ್ಲಿ ಮಾಡುವ ಪ್ರದಕ್ಷಿಣಾ ಜಪ.
ಅಖಂಡ ಜಪ: ಇದು ಖಂಡ ಮಾಡದೇ ಮಾಡುವ (ನಿಲ್ಲಿಸದೆ, ನಿರಂತರವಾಗಿ) ಜಪ. ಒಂದು ನಿರ್ದಿಷ್ಟ ಕಾಲದಲ್ಲಿ ಪ್ರಾರಂಭಿಸಿ ಎಡಬಿಡದೆ ನಿರ್ದಿಷ್ಟ ಕಾಲದವರೆಗೆ ಹಗಲೂ ರಾತ್ರಿ ಎನ್ನದೆ ನಿರಂತರವಾಗಿ ಮಾಡುವ ಜಪ.
ಅಜಪಾಜಪ: ಇದನ್ನು ಹಂಸ ಜಪ ಎನ್ನಲಾಗುತ್ತದೆ. ಸೋSಹಂ ಮಂತ್ರವು ಅಜಾಪಜಪವಾಗಿದೆ.
ಲಿಖಿತ ಜಪ: ಇದು ದೇವರ ನಾಮಗಳನ್ನು ಬರೆಯುತ್ತಾ ಜಪಿಸುವ ವಿಧಾನ.
ಅಚಲ ಜಪ: ಒಂದು ಕಡೆ ಸ್ಥಿರವಾಗಿ ಕುಳಿತು ಮಾಡುವ ಜಪ.
ಚಲ ಜಪ: ಓಡಾಡುತ್ತಾ ಹೇಳಿಕೊಳ್ಳಬಹುದಾದ ಜಪ. ಇದನ್ನು ಸಂಕೀರ್ತನ ಜಪ ಎಂದೂ ಕರೆಯಲಾಗುತ್ತದೆ.
ಭಗವದ್ಗೀತೆಯಲ್ಲಿ ಶ್ರೀ ಕೃಷ್ಣನು ಈ ಜಪವನ್ನ ಯಜ್ಞ ಎಂದು ಕರೆದಿದ್ದಾನೆ. ಕಲಿಯುಗದಲ್ಲಂತೂ ಜಪವೇ ಯಜ್ಞ. ನಮಗೆ ಯಾವ ಜಪವಿಧಾನ ಸೂಕ್ತ ಎನ್ನಿಸುತ್ತದೆಯೋ ಅದನ್ನು ಗುರುಮುಖೇನ ದೀಕ್ಷೆ ಪಡೆದು ಅನುಷ್ಠಾನ ಮಾಡಬಹುದಾಗಿದೆ.
ಏಕಾಕ್ಷರದಿಂದ 24 ಅಕ್ಷರಗಳವರೆಗೆ…
ಏಕಾಕ್ಷರಿ ಮಂತ್ರ : ಓಂ
ದ್ವ್ಯಕ್ಷರಿ ಮಂತ್ರ : ರಾಮ
ತ್ರ್ಯಕ್ಷರೀ ಮಂತ್ರ – ಶ್ರೀ ರಾಮ, ಓಂ ಶೀವ, ಶಿವೋSಹಂ
ಪಂಚಾಕ್ಷರೀ ಮಂತ್ರ : ನಮಃ ಶಿವಾಯ
ಷಡಕ್ಷರೀ ಮಂತ್ರ : ಓಂ ನಮ: ಶಿವಾಯ, ಹ್ರೀಂ ನಮಃ ಶಿವಾಯ, ಓಂ ಶಿವಾಯೈ ನಮಃ
ಅಷ್ಟಾಕ್ಷರೀ ಮಂತ್ರ : ಓಂ ನಮೋ ನಾರಾಯಣಾಯ
ದಶಾಕ್ಷರೀ ಮಂತ್ರ : ಓಂ ನಮೋ ಭಗವತೇ ರುದ್ರಾಯ
ದ್ವಾದಶಾಕ್ಷರೀ ಮಂತ್ರ : ಓಂ ನಮೋ ಭಗವತೇ ವಾಸುದೇವಾಯ / ಶ್ರೀ ಲಲಿತಾತ್ರಿಪುರ ಸೌಂದರ್ಯೈ ನಮಃ
ತ್ರಯೋದಶಾಕ್ಷರೀ ಮಂತ್ರ : ಓಂ ಶ್ರೀ ಲಲಿತಾತ್ರಿಪುರ ಸೌದರ್ಯೈ ನಮಃ
ಪಂಚದಶಾಕ್ಷರೀ ಮಂತ್ರ : ಕ ಏ ಈ ಲ ಹ್ರೀಂ ಹ ಸ ಕ ಹ ಲ ಹ್ರೀಂ ಸಕಲ ಹ್ರೀಂ
ಚತುರ್ವಿಂಶತ್ಯಕ್ಷರ : ಗಾಯತ್ರೀ ಮಂತ್ರ
