ಅಮರು ಶತಕ, ಅಮರುಕ ಎಂಬ ಕವಿ ಸಂಸ್ಕೃತದಲ್ಲಿ ಬರೆದಿರುವ ಪ್ರಣಯನಿಬಂಧ. ಇದು ಪ್ರಣಯವನ್ನು ಚಿತ್ರಿಸುವ ಬಿಡಿ ಪದ್ಯಗಳ ಒಂದು ಸಂಕಲನ. ಈ ಕೃತಿಯ ಆಯ್ದ ಪದ್ಯಗಳನ್ನು ಚಿದಂಬರ ನರೇಂದ್ರ ಅವರು ಅರಳಿಮರಕ್ಕಾಗಿ ಇಂಗ್ಲೀಶಿನಿಂದ ಕನ್ನಡಕ್ಕೆ ಅನುವಾದಿಸಿದ್ದಾರೆ. ಈ ಸರಣಿಯ 3ನೇ ಭಾಗ ಇಲ್ಲಿದೆ…

18

ತನ್ನ ಇಬ್ಬರೂ ಪ್ರಿಯತಮೆಯರು
ಅಕ್ಕ ಪಕ್ಕ ಕುಳಿತಿರುವುದನ್ನ ನೋಡಿದ ಅವನು
ಮೆತ್ತಗೆ ಅವರ ಹಿಂದೆ ಹೋಗಿ
“ಯಾರು ಹೇಳು ನೋಡೋಣ” ಎನ್ನುತ್ತ
ಒಬ್ಬಳ ಕಣ್ಣು ಮುಚ್ಚಿದ
ಆಕೆ ಉತ್ತರ ಹೇಳುವ ಮೊದಲೇ
ಬಾಗಿ ಇನ್ನೊಬ್ಬಳ ಕೆನ್ನೆಯನ್ನು ಚುಂಬಿಸಿದ.
ಕೆಂಪಾದವು ಇಬ್ಬರ ಗಲ್ಲಗಳೂ
ನಲ್ಲನ ಪ್ರೇಮಕ್ಕೆ ಪುಳಕಿತವಾಗಿ.

---

19

ಅವಳು ಕಠಿಣಳಾದಾಗ
ನಿರುಪಾಯನಾಗಿ ಅವಳ ಕಾಲಿಗೆ ಬಿದ್ದ ಅವನು.
“ಮೋಸಗಾರ”
ಆಕೆ ಮತ್ತೆ ಮತ್ತೆ ಆರೋಪಿಸಿದಾಗ ಸಿಟ್ಟಿಗೆದ್ದು
ಹೊರಟೇಬಿಟ್ಟ ಅಲ್ಲಿಂದ ಅವನು.
ಜಗತ್ತಿಗೇ ಕೇಳಿಸುವಂತಿತ್ತು ಅವಳ ನಿಟ್ಟುಸಿರು,
ಜೋರಾಗಿ ಹೊಡೆದುಕೊಳ್ಳುತ್ತಿದ್ದ
ತನ್ನ ಎದೆಯ ಮೇಲೆ ಕೈಯಿಟ್ಟುಕೊಂಡು ಆಕೆ
ತನ್ನ ಗೆಳತಿಯರತ್ತ ಹೊರಳಿದಾಗ
ತುಂಬಿ ಬಂದಿದ್ದವು ಅವಳು ಕಣ್ಣುಗಳು
ಬದುಕು ಮಸುಕು ಮಸುಕಾಗಿ.

---

20

“ ಜಗತ್ತಿನ ಚೆಲುವನ್ನೆಲ್ಲ ಒಬ್ಬಳಲ್ಲೇ ಮುಚ್ಚಿಟ್ಟು
ಒಡ್ಯಾಣ ಕಟ್ಟಿಬಿಟ್ಟಿದ್ದಾನಲ್ಲ ಬ್ರಹ್ಮ “
ಅವನು ದಾಸಿಗೆ ಹೇಳಿದ
ಪಿಸುಮಾತು ಕೇಳಿಸಿಕೊಂಡ ಅವಳು,
ನಸುಗೋಪದಲ್ಲಿ ನಿದ್ದೆಯನ್ನು ನಟಿಸುತ್ತ
“ನಿದ್ದೆಯಲ್ಲೂ ನನ್ನ ಕಾಡುತ್ತಿದ್ದಾನೆ”
ಎನ್ನುತ್ತ ಹೊರಳಿದಳು ಹಾಸಿಗೆಯ ಮೇಲೆ
ಜಾಗ ಮಾಡಿ ಕೊಡುವವಳಂತೆ ಅವನಿಗೆ.

---

21

ಹಾಸಿಗೆಯಲ್ಲಿ ಅದೇನೋ ಮುನಿಸು
ಬೆನ್ನು ಮಾಡಿದರು ಇಬ್ಬರೂ ಒಬ್ಬರಿಗೊಬ್ಬರು.
ಇಬ್ಬರ ಹೃದಯಗಳು
ಮತ್ತೆ ಒಂದಾಗಲು ತವಕಿಸುತ್ತಿದ್ದವಾದರೂ
ಸಂಕಟವಾಗಿ ಕಾಡುತ್ತಿತ್ತು ಮುಜುಗರ,
ಚೋರ ಕಣ್ಣುಗಳು ಒಂದಾದಾಗ ಕೊನೆಗೊಮ್ಮೆ
ಇಬ್ಬರ ತುಟಿಯ ಮೇಲೂ ನಿರುದ್ದೇಶದ ನಗು
ಅಪ್ಪಿಕೊಂಡರು ಹುಚ್ಚರಂತೆ ಒಬ್ಬರನೊಬ್ಬರು
ಬೇಡ ಇನ್ನು ಯಾವ ಕಾರಣ
ಜಗತ್ತಿನ ಮುನಿಸು ಮುರಿಯಲು.

---

22

ಅವಳ ಪ್ರತಿಕ್ರಿಯೆ ಏನು ನೋಡೋಣ
ಮುಖ ಕಠಿಣವಾಗಿಸಿಕೊಂಡಿದ್ದೆ ನಾನು,
ಯಾಕೆ ಈ ದುಷ್ಟನೇ ಮೊದಲು ಮಾತಾಡಬಾರದು
ಎನ್ನುವ ಭಾವ ಅವಳ ಮುಖದಲ್ಲಿ,
ಇಬ್ಬರೂ ಒಬ್ಬರನ್ನೊಬ್ಬರು ಕುತೂಹಲದಿಂದ ನೋಡುತ್ತ
ಅಲ್ಲೊಂದು ಮೋಹಕ ಬಿಕ್ಕಟ್ಟು.
ಏನೋ ನೆನಪಾಯಿತು ನನಗೆ, ನಕ್ಕೆ
ಬಿಕ್ಕಿ ಬಿಕ್ಕಿ ಅತ್ತಳು ಆಕೆ
ಜಗದ ಸಂಶಯ ಕರಗುವಂತೆ.

---

23

ಹಾಸಿಗೆಯಲ್ಲಿ
ಅವನ ಬಾಯಿಯಿಂದ ಇನ್ನೊಬ್ಬಳ ಹೆಸರು ಬಂದಾಗ
ಬತ್ತಿ ಹೋದಂತಾಯಿತು ಅವಳಿಗೆ ತನ್ನ ಹರೆಯ,
ತಣ್ಣಗಾದಳು ಆಕೆ ಕಾಲು ಮಡಿಚಿಕೊಳ್ಳುತ್ತ.
ಅವನು ಗಾಬರಿಯಲ್ಲಿ
ಸುಮ್ಮನಾಗಿ ಹೋದ ಪರಿಗೆ ಬೆದರಿ
ಹುರಿದುಂಬಿಸಿದಳು ಆಕೆ ಅವನನ್ನು ಮತ್ತೆ
ಸರಸಕ್ಕೆಳೆಯುತ್ತ.

---

24

“ನನ್ನ ಕಾಲಿಗೆ ಬೀಳುವ ನೆಪದಲ್ಲಿ
ಅವಳನ್ನು ಅಪ್ಪಿಕೊಂಡಾಗ
ನಿನ್ನ ಎದೆಗೆ ಅಂಟಿಕೊಂಡಿರುವ
ಅವಳ ಮೊಲೆ ತುದಿಯ ರಂಗನ್ನು
ಮುಚ್ಚಿಕೊಳ್ಳಬೇಡ”

ಅವಳು ಯಾವ ಭಿಡೆ ಇಲ್ಲದೆ ಆರೋಪಿಸಿದಾಗ

“ಎಲ್ಲಿ ಎಲ್ಲಿ?” ಎನ್ನುತ್ತ ನಾನು ಎದ್ದು
ಆ ರಂಗು ಒರೆಸಿಕೊಳ್ಳಲು
ಅವಳನ್ನು ಬರಸೆಳೆದು ಅಪ್ಪಿಕೊಂಡ ಬಿರುಸಿಗೆ
ಆ ನಾಜೂಕಿನ ಹುಡುಗಿ
ಅಂಟಿಕೊಂಡುಬಿಟ್ಟಳು ನನ್ನ ಎದೆಗೆ
ಎಲ್ಲ ಮರೆತು.

---

25

ನಿನ್ನ ಕಣ್ಣುಗಳೆಂದರೆ ಹಬ್ಬ ನನಗೆ
ಎದೆಯ ಮೇಲಿನ ಆ ಬಟ್ಟೆಯೊಂದು ಇಲ್ಲದಿದ್ದರೆ
ಇನ್ನೂ ಚೆಂದ ನಿನ್ನ ಚೆಲುವು …..
ಎನ್ನುತ್ತ ಅವನು
ಅವಳ ಹೆರಳಿಗೆ ಕೈ ಹಾಕಿದಾಗ
ಅವಳ ಕಣ್ಣುಗಳಲ್ಲಿನ ಸಂಭ್ರಮ ಕಂಡು
ಹಾಸಿಗೆಯ ತುದಿಯಲ್ಲಿ ಕುಳಿತಿದ್ದ
ಅವಳ ಗೆಳತಿಯರು
ಅಲ್ಲಿಂದ ಜಾಗ ಖಾಲೀ ಮಾಡಿದರು
ಏನೋ ಸುಳ್ಳು ನೆಪ ಹೇಳಿ.

---

ಹಿಂದಿನ ಭಾಗ ಇಲ್ಲಿ ಓದಿ: https://aralimara.com/2024/07/28/amaru-2/