ಆಳವಾದ ಕೃತಜ್ಞತೆ ಮತ್ತು ಪ್ರೀತಿಯಿಂದ ಗುರುವನ್ನೇ ಗಮನಿಸುತ್ತಾ, ಅವನ ಶಕ್ತಿಯನ್ನು ಮೌನವಾಗಿ ನಿಮ್ಮೊಳಗೆ ಹೀರಿಕೊಳ್ಳುತ್ತಾ ಇರಿ… ಅದು ಬಹುತೇಕ ಬಾಯಾರಿಕೆಯಿಂದ ಬಳಲುತ್ತಿರುವಾಗ ನೀರನ್ನು ಕುಡಿಯುವಂತಿರುತ್ತದೆ. ಆಗ ನಿಮ್ಮೊಳಗೆ ಒಂದು ಆಳವಾದ ತೃಪ್ತಿ ಮತ್ತು ಪರಿಪೂರ್ಣತೆಯ ಭಾವನೆ ನಿಧಾನವಾಗಿ ಇಳಿದುಬರುತ್ತದೆ… । ಓಶೋ / Dogen, the Zen Master: A Search and a Dive Little Deep; ಸಂಗ್ರಹ – ಅನುವಾದ : ಚಿದಂಬರ ನರೇಂದ್ರ

ಗುರುವಿನ ಪ್ರಭಾವದ ವಲಯಕ್ಕೆ ‘ಬುದ್ಧಕ್ಷೇತ್ರ’ ಎಂದು ಕರೆಯಲ್ಪಡುವ ಗುರುವಿನ ಕ್ಷೇತ್ರಕ್ಕೆ, ನೀವು ಒಮ್ಮೆ ಪ್ರವೇಶಿಸಿದ ಕ್ಷಣದಲ್ಲೇ, ನಿಮ್ಮೊಳಗೆ ಹೊಸ ಶಕ್ತಿಯೊಂದು ಕಂಪಿಸತೊಡಗುತ್ತದೆ… ಕೆಳಮಟ್ಟದಲ್ಲಿ, ಭೌತಿಕ ಮತ್ತು ಜೈವಿಕ ಮಟ್ಟದಲ್ಲಿ ಪ್ರೀತಿ ಹೇಗೆ ಹಠಾತ್ತನೆ ಸಂಭವಿಸುತ್ತದೆಯೋ, ಅದೇ ರೀತಿಯಲ್ಲಿ… ಗುರುವನ್ನು ಕಂಡುಕೊಳ್ಳುವುದು ಅತ್ಯುನ್ನತ ಪ್ರೀತಿಯ ಒಂದು ರೂಪ. ಆಗ ಹಠಾತ್ತನೆ ನಿಮ್ಮೊಳಗೆ ಒಂದು ಹೊಸ ತಾಜಾತನವನ್ನು ಅನುಭವಿಸುತ್ತೀರಿ. ನಿಮ್ಮೊಳಗಿಂದ ಹೊಸದೊಂದು ತಂಗಾಳಿ ಬೀಸುತ್ತಿರುವಂತೆ ಭಾಸವಾಗುತ್ತದೆ. ಯಾವುದೇ ಶಬ್ದವಿಲ್ಲದ, ಆದರೆ ನಿಮ್ಮೊಳಗೆ ಹೊಸ ಹಾಡೊಂದನ್ನು ಮೊಳಗಿಸುವ ಅನುಭವವೊಂದು ಉಂಟಾಗುತ್ತದೆ. ಆ ಕ್ಷಣದಲ್ಲಿ ನಿಮ್ಮ ಪಾಲಿಗೆ ಉಳಿಯುವುದು ಒಂದೇ, ಆಳವಾದ ಕೃತಜ್ಞತೆಯಲ್ಲಿ ವಿಶ್ರಾಂತಿ ಪಡೆಯುವುದು.
‘ಧನ್ಯವಾದ’ ಎಂಬ ಪದವನ್ನೂ ಉಚ್ಚರಿಸಬೇಡಿ; ಏಕೆಂದರೆ ಆ ಪದವೇ ನಿಮ್ಮನ್ನೂ ಅವನನ್ನೂ ಬೇರ್ಪಡಿಸುತ್ತದೆ. ಇದು ಯಾವುದೇ ಮಾತನ್ನು ಆಡುವ ಸಮಯವಲ್ಲ… ಕೇವಲ ಕೃತಜ್ಞತೆಯ ಒಂದು ಸನ್ನೆಯೇ ಸಾಕು.

ಒಮ್ಮೆ ನಾವು ಒಬ್ಬ ಗುರುವಿನೊಂದಿಗೆ ಭೇಟಿಯಾದ ಮೇಲೆ, ಆ ಮಾರ್ಗವನ್ನು ಅಭ್ಯಾಸ ಮಾಡಬೇಕು. ಆದರೆ ಗುರುವೇ ಸ್ವತಃ ಮಾರ್ಗವಾಗಿದ್ದರೆ, ಆ ಮಾರ್ಗವನ್ನು ಹೇಗೆ ಅಭ್ಯಾಸಿಸುವುದು?
ಗುರು ಹೇಗೆ ನಡೆಯುತ್ತಾನೆ ಎನ್ನುವುದನ್ನು ಗಮನಿಸಿ.
ಅವನು ಯಾವ ಸನ್ನೆಗಳನ್ನು ಮಾಡುತ್ತಾನೆ ಎನ್ನುವುದನ್ನು ಗಮನಿಸಿ.ವಿವಿಧ ಸಂದರ್ಭಗಳಿಗೆ ಅವನು ಹೇಗೆ ಪ್ರತಿಕ್ರಿಯಿಸುತ್ತಾನೆ ಗಮನಿಸಿ. ಏಕೆಂದರೆ ಅವನು ಪ್ರತಿಯೊಂದು ಕ್ಷಣದಲ್ಲೂ ಪರಿಪೂರ್ಣ ಜಾಗೃತಿಯಲ್ಲಿರುತ್ತಾನೆ. ಅವನ ಪ್ರತಿಯೊಂದು ಕ್ರಿಯೆಯೂ ಅವನ ಅಂತರಂಗದ ಅಸ್ತಿತ್ವದ ಸೂಚನೆಯಾಗಿರುತ್ತದೆ.

ಅವನನ್ನು ಗಮನಿಸಿ!

ಅವನು ನಿದ್ರಿಸುತ್ತಿರುವಾಗ ಗಮನಿಸಿ.
ಅವನು ಎಚ್ಚರಗೊಳ್ಳುವಾಗ ಗಮನಿಸಿ.
ಅವನು ಮಾತನಾಡುತ್ತಿರುವಾಗ ಗಮನಿಸಿ.
ಅವನು ಮೌನವಾಗಿ ಕುಳಿತಿರುವಾಗಲೂ ಗಮನಿಸಿ.
ಏನನ್ನೂ ಮಾಡದೆ ಸುಮ್ಮನೆ ಇರುವ ಕ್ಷಣದಲ್ಲಿಯೂ ಅವನನ್ನು ಗಮನಿಸಿ.

ಆಳವಾದ ಕೃತಜ್ಞತೆ ಮತ್ತು ಪ್ರೀತಿಯಿಂದ ಗುರುವನ್ನೇ ಗಮನಿಸುತ್ತಾ, ಅವನ ಶಕ್ತಿಯನ್ನು ಮೌನವಾಗಿ ನಿಮ್ಮೊಳಗೆ ಹೀರಿಕೊಳ್ಳುತ್ತಾ ಇರಿ… ಅದು ಬಹುತೇಕ ಬಾಯಾರಿಕೆಯಿಂದ ಬಳಲುತ್ತಿರುವಾಗ ನೀರನ್ನು ಕುಡಿಯುವಂತಿರುತ್ತದೆ. ಆಗ ನಿಮ್ಮೊಳಗೆ ಒಂದು ಆಳವಾದ ತೃಪ್ತಿ ಮತ್ತು ಪರಿಪೂರ್ಣತೆಯ ಭಾವನೆ ನಿಧಾನವಾಗಿ ಇಳಿದುಬರುತ್ತದೆ.

ಮಾತುಗಳ ಅಗತ್ಯವಿಲ್ಲ.
ವಿವರಣೆಗಳ ಅಗತ್ಯವಿಲ್ಲ.
ಕೇವಲ ಗಮನಿಸುವುದು…
ಕೇವಲ ತೆರೆದುಕೊಳ್ಳುವುದು…
ಕೇವಲ ಸ್ವೀಕರಿಸುವುದು…

ಗುರುವಿನ ಸಾನ್ನಿಧ್ಯದಲ್ಲಿ, ನಿಮ್ಮೊಳಗಿನದೇ ಆದ ಒಂದು ಹೊಸ ಜಾಗೃತಿ ನಿಧಾನವಾಗಿ ಎಚ್ಚರಗೊಳ್ಳುತ್ತದೆ.