~ ಓಶೋ / The Rebellious Spirit । ಸಂಗ್ರಹ – ಅನುವಾದ ಚಿದಂಬರ ನರೇಂದ್ರ
ಶಿಷ್ಯರು: ಅಸ್ತಿತ್ವದ ಅರ್ಥದಲ್ಲಿ ‘Wanting’, ‘Desiring’ ಮತ್ತು ‘Longing’ — ಈ ಮೂರರ ನಡುವಿನ ವ್ಯತ್ಯಾಸವೇನು?
ಓಶೋ: ಈ ಮೂರರ ನಡುವಿನ ವ್ಯತ್ಯಾಸ ಬಹಳ ದೊಡ್ಡದು. ನಿಘಂಟು ಹೇಳುವ ವ್ಯತ್ಯಾಸಕ್ಕಿಂತಲೂ ಬಹಳ ಹೆಚ್ಚು.
Wanting ಎಂದರೆ ಬಹಳ ಸ್ಪಷ್ಟವಾದ ಬಯಕೆ.
Desiring ಎಂದರೆ ಹೆಚ್ಚು ಅಸ್ಪಷ್ಟವಾದ, ಮತ್ತು ಯಾವಾಗಲೂ ಸ್ಪರ್ಧಾತ್ಮಕವಾದ ಅಪೇಕ್ಷೆ.
Longing ಎಂದರೆ ಒಂದು ದಾಹ ಮತ್ತು ಅದು ಅತ್ಯಂತ ಸುಂದರವಾದದ್ದು.
“Wanting” ಎಂದರೆ ನೀವು ಬಯಸುವ ವಸ್ತುವಿನ ಬಗ್ಗೆ ಬಹಳ ಸ್ಪಷ್ಟವಾದ ಕಲ್ಪನೆ ಇರುವುದು. ನೀವು ಏನನ್ನು ಬಯಸುತ್ತಿದ್ದೀರಿ ಎನ್ನುವುದು ನಿಮಗೆ ಸ್ಪಷ್ಟವಾಗಿರುತ್ತದೆ. ಅದು ಅಸ್ಪಷ್ಟವಲ್ಲ.
ನಿಮಗೆ ಒಂದು ಮನೆ ಬೇಕು, ನಿಮಗೆ ಒಬ್ಬ ಹೆಂಡತಿ ಬೇಕು, ನಿಮಗೆ ಮಕ್ಕಳಿರಬೇಕು. ಇಲ್ಲಿ ‘ಬಯಕೆ’ಯ ವಸ್ತು ಬಹಳ ಸ್ಪಷ್ಟವಾಗಿದೆ.
ಆದರೆ “Desiring” ಅಸ್ಪಷ್ಟವಾದದ್ದು. ಅಪೇಕ್ಷೆಯ ವಸ್ತು ಸ್ಪಷ್ಟವಾಗಿರುವುದಿಲ್ಲ.
ನಿಮಗೆ ಅಧಿಕಾರ ಬೇಕು; ನೀವು ಪ್ರತಿಷ್ಠೆಯನ್ನು ಅಪೇಕ್ಷಿಸುತ್ತೀರಿ, ಗೌರವವನ್ನು ಅಪೇಕ್ಷಿಸುತ್ತೀರಿ; ಈ ಜಗತ್ತಿನಲ್ಲೇ ಅತ್ಯಂತ ಶ್ರೇಷ್ಠ ವ್ಯಕ್ತಿಯಾಗಬೇಕೆಂದು ನೀವು ಅಪೇಕ್ಷಿಸುತ್ತೀರಿ.
“Wanting” ಸರಳವಾದದ್ದು. ಅದನ್ನು ನೀವು ಈಡೇರಿಸಿಕೊಳ್ಳುವ ಸಾಧ್ಯತೆಯೂ ಇದೆ. ಏಕೆಂದರೆ ಒಂದು ಮನೆ, ಒಬ್ಬ ಸಂಗಾತಿ, ಮಕ್ಕಳು ಇರುವುದು ಅಸಾಧ್ಯವಾದ ಕೆಲಸವಲ್ಲ. ವಾಸ್ತವವಾಗಿ, ಅವುಗಳಿಲ್ಲದೆ ಬದುಕುವುದೇ ಕೆಲವೊಮ್ಮೆ ಹೆಚ್ಚು ಕಷ್ಟಕರ.
ಆದರೆ “Desire” ಅಸ್ಪಷ್ಟವಾದದ್ದು.
ಪ್ರತಿಷ್ಠೆ ಎನ್ನುವುದು ಒಂದು ವಸ್ತುವಲ್ಲ; ಅದು ಕೇವಲ ಒಂದು ಕಲ್ಪನೆ.
ಗೌರವ ಎನ್ನುವುದು ಒಂದು ವಸ್ತುವಲ್ಲ; ಅದು ಕೇವಲ ಒಂದು ಕಲ್ಪನೆ.
ಈ ಜಗತ್ತಿನಲ್ಲೇ ಅತ್ಯಂತ ಶ್ರೇಷ್ಠ ವ್ಯಕ್ತಿಯಾಗಬೇಕು ಎನ್ನುವುದು ಕೂಡ ಒಂದು ವಸ್ತುವಲ್ಲ; ಅದು ಕೇವಲ ಒಂದು ಕಲ್ಪನೆ.
ಮತ್ತು ಜಗತ್ತು ಯಾರನ್ನಾದರೂ ಅತ್ಯಂತ ಶ್ರೇಷ್ಠ ವ್ಯಕ್ತಿ ಎಂದು ಭಾವಿಸಿದರೂ, ಆ ವ್ಯಕ್ತಿಯೂ ತನ್ನ ಆಳದಲ್ಲಿ ಸಂತೋಷವಾಗಿರಬೇಕೆಂದೇನಿಲ್ಲ.
Desire ಅಸ್ಪಷ್ಟವಾದದ್ದು.
ಆದರೆ Longing ಎನ್ನುವುದು “Wanting” ಮತ್ತು “Desire” ಎರಡರಿಂದಲೂ ಸಂಪೂರ್ಣವಾಗಿ ಭಿನ್ನವಾದದ್ದು.
Wanting ಮತ್ತು Desire — ಇವೆರಡೂ ತಲೆಯಿಂದ ಹುಟ್ಟುವವು. ಒಂದರಲ್ಲಿ ಸ್ಪಷ್ಟವಾದ ವಸ್ತುವಿನ ಬಯಕೆ ಇರುತ್ತದೆ; ಮತ್ತೊಂದರಲ್ಲಿ ಅಸ್ಪಷ್ಟವಾದ ಆದರ್ಶಗಳ ಅಪೇಕ್ಷೆ ಇರುತ್ತದೆ.
ಆದರೆ Longing ಹೃದಯಕ್ಕೆ ಸೇರಿದ್ದು, ಮನಸ್ಸಿಗೆ ಅಲ್ಲ.
ಹೃದಯವೇ ಹಂಬಲಿಸುತ್ತದೆ. ಹಂಬಲದ ನೋವನ್ನು ಅನುಭವಿಸುವುದೂ ಹೃದಯವೇ.
ಹೃದಯಕ್ಕೆ ಹಣದೊಂದಿಗೆ ಯಾವುದೇ ವ್ಯವಹಾರವಿಲ್ಲ. ಅಧಿಕಾರದೊಂದಿಗೂ ಯಾವುದೇ ವ್ಯವಹಾರವಿಲ್ಲ.
ಹೃದಯದ ಹಂಬಲ ಕೇವಲ ಪ್ರೀತಿಗಾಗಿ…
ಮತ್ತು ಅಂತಿಮವಾಗಿ ದೇವರಿಗಾಗಿ. ಏಕೆಂದರೆ ದೇವರು ಪ್ರೀತಿಯ ಅತ್ಯಂತ ಪರಿಶುದ್ಧ ರೂಪ, ಅದರಾಚೆಗೆ ಮತ್ತೇನೂ ಇಲ್ಲ.
ಒಂದೇ ರೀತಿಯಾಗಿ ಕಾಣಿಸುವ ಪದಗಳ ನಡುವಿನ ವ್ಯತ್ಯಾಸವನ್ನು ಕುರಿತು ಆಲೋಚಿಸುವುದು ಒಂದು ಒಳ್ಳೆಯ ಅಭ್ಯಾಸ.
ಅದು ನಿಮಗೆ ಸ್ಪಷ್ಟತೆಯನ್ನು ನೀಡುತ್ತದೆ.
Longing ಎಂದರೆ ಕೇವಲ ಒಂದು ದಾಹ, ಮತ್ತು ಅದು ಸುಂದರವಾದದ್ದು.
Desire ಮಾತ್ರ ಕುರೂಪವಾದದ್ದು, ಏಕೆಂದರೆ ಅದು ಯಾವಾಗಲೂ ಸ್ಪರ್ಧಾತ್ಮಕವಾಗಿರುತ್ತದೆ.
ನಿಮ್ಮ ಬಳಿ ಇಲ್ಲದಿರುವುದನ್ನು ಹೊಂದಿರುವವರ ಬಗ್ಗೆ ಅಸೂಯೆ ಹುಟ್ಟುತ್ತದೆ.
ಮತ್ತು ಆ ಅಪೇಕ್ಷೆಯನ್ನು ಈಡೇರಿಸಿಕೊಳ್ಳಲು ಅದು ಯಾರಿಗಾದರೂ ಯಾವುದೇ ರೀತಿಯ ಹಾನಿಯನ್ನು ಉಂಟುಮಾಡಬಲ್ಲದು.
ಅದು ಹಿಂಸಾತ್ಮಕವಾದದ್ದು.
