ಗುರು ಒಬ್ಬ ಶಿಷ್ಯನನ್ನು ಆಯ್ಕೆ ಮಾಡುವಾಗ, ಸಂಪೂರ್ಣ ಅರಿವಿನಿಂದ ಆಯ್ಕೆ ಮಾಡುತ್ತಾನೆ. ಅವನು ನಿಮ್ಮ ಅಂತರಂಗವನ್ನು ಭೇದಿಸಿ ನೋಡುತ್ತಾನೆ. ನಿಮ್ಮಲ್ಲಿರುವ ಎಲ್ಲ ಸಾಮರ್ಥ್ಯಗಳು, ಸಾಧ್ಯತೆಗಳು, ನಿಮ್ಮ ಭೂತಕಾಲ ಮತ್ತು ಭವಿಷ್ಯ, ನಿಮ್ಮ ಇಡೀ ವಿಧಿಯೇ ಅವನಿಗೆ ಗೋಚರಿಸುತ್ತದೆ. ಆದರೆ ನೀವು ಗುರುವನ್ನೇ ಆಯ್ಕೆ ಮಾಡಿಕೊಳ್ಳುವಾಗ, ಬಹುತೇಕ ಸಂದರ್ಭಗಳಲ್ಲಿ ನಿಮ್ಮ ಆಯ್ಕೆ ತಪ್ಪಾಗಿರುತ್ತದೆ ~ ಓಶೋ / The Grass Grows By Itself । ಕನ್ನಡಕ್ಕೆ : ಚಿದಂಬರ ನರೇಂದ್ರ

“ಶಿಷ್ಯರಲ್ಲಿ ಎರಡು ವಿಧಗಳಿವೆ. ಒಂದು ಬಗೆಯ ಶಿಷ್ಯನನ್ನು ಗುರು ಆಯ್ಕೆ ಮಾಡಿದರೆ, ಮತ್ತೊಂದು ಬಗೆಯ ಶಿಷ್ಯ ತಾನೇ ಗುರುವನ್ನು ಆಯ್ಕೆ ಮಾಡಿಕೊಳ್ಳುತ್ತಾನೆ. ಈ ಇಬ್ಬರ ಗುಣಲಕ್ಷಣಗಳು ವಿಭಿನ್ನವಾಗಿರುತ್ತವೆ…

ಗುರುವೇ ನಿಮ್ಮನ್ನು ಆಯ್ಕೆ ಮಾಡಿಕೊಂಡಾಗ, ಅದು ಸಂಪೂರ್ಣವಾಗಿ ಭಿನ್ನವಾದ ಅನುಭವವಾಗಿರುತ್ತದೆ. ಆದರೆ ಗುರು ನಿಮ್ಮನ್ನು ತಾನೇ ಆಯ್ಕೆ ಮಾಡಿಕೊಂಡಿದ್ದೇನೆ ಎನ್ನುವುದು ನಿಮಗೆ ಎಂದಿಗೂ ತಿಳಿಯಲು ಬಿಡುವುದಿಲ್ಲ. ವಾಸ್ತವವಾಗಿ, ನೀವೇ ಗುರುವನ್ನಾಗಿ ತನ್ನನ್ನು ಆಯ್ಕೆ ಮಾಡಿಕೊಂಡಿದ್ದೀರಿ ಎನ್ನುವ ಭಾವನೆ ನಿಮ್ಮಲ್ಲಿ ಮೂಡುವಂತೆ ಗುರು ಬಹಳ ಸೂಕ್ಷ್ಮವಾಗಿ ನಡೆದುಕೊಳ್ಳುತ್ತಾನೆ.

ಇದರಲ್ಲಿ ಗುರು ಬಹಳ ಜಾಣ್ಮೆಯಿಂದ ವರ್ತಿಸಬೇಕಾಗುತ್ತದೆ. ಏಕೆಂದರೆ, ತಾನೇ ನಿಮ್ಮನ್ನು ಆಯ್ಕೆ ಮಾಡಿಕೊಂಡಿದ್ದೇನೆ ಎನ್ನುವುದು ನಿಮಗೆ ತಿಳಿದುಬಿಟ್ಟರೆ, ನಿಮ್ಮ ಅಹಂಕಾರವೇ ಸಮಸ್ಯೆಯನ್ನು ಸೃಷ್ಟಿಸಬಹುದು. ಅಹಂಕಾರಕ್ಕೆ ತಾನೇ ಯಜಮಾನನಾಗಿರಬೇಕು, ಎಲ್ಲವೂ ತನ್ನ ನಿಯಂತ್ರಣದಲ್ಲಿರಬೇಕು ಎಂಬ ಆಸೆ ಇರುತ್ತದೆ.
ಪ್ರತಿದಿನವೂ ನಾನು ಇದೇ ಪರಿಸ್ಥಿತಿಯನ್ನು ಎದುರಿಸುತ್ತೇನೆ. ನಾನು ನಿಮ್ಮನ್ನು ಆಯ್ಕೆ ಮಾಡುತ್ತಿದ್ದೇನೆ ಎನ್ನುವುದು ನಿಮಗೆ ತಿಳಿಯದಂತೆ ನೋಡಿಕೊಳ್ಳಬೇಕು. ಬದಲಾಗಿ, ನೀವೇ ನನ್ನನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯವನ್ನು ನಿಮಗೆ ನೀಡಬೇಕು.

ಆದರೆ ಈ ಎರಡರ ನಡುವಿನ ವ್ಯತ್ಯಾಸ ಬಹಳ ದೊಡ್ಡದು.
ಏಕೆಂದರೆ, ಗುರು ಒಬ್ಬ ಶಿಷ್ಯನನ್ನು ಆಯ್ಕೆ ಮಾಡುವಾಗ, ಸಂಪೂರ್ಣ ಅರಿವಿನಿಂದ ಆಯ್ಕೆ ಮಾಡುತ್ತಾನೆ. ಅವನು ನಿಮ್ಮ ಅಂತರಂಗವನ್ನು ಭೇದಿಸಿ ನೋಡುತ್ತಾನೆ. ನಿಮ್ಮಲ್ಲಿರುವ ಎಲ್ಲ ಸಾಮರ್ಥ್ಯಗಳು, ಸಾಧ್ಯತೆಗಳು, ನಿಮ್ಮ ಭೂತಕಾಲ ಮತ್ತು ಭವಿಷ್ಯ, ನಿಮ್ಮ ಇಡೀ ವಿಧಿಯೇ ಅವನಿಗೆ ಗೋಚರಿಸುತ್ತದೆ.

ಆದರೆ ನೀವು ಗುರುವನ್ನೇ ಆಯ್ಕೆ ಮಾಡಿಕೊಳ್ಳುವಾಗ, ಬಹುತೇಕ ಸಂದರ್ಭಗಳಲ್ಲಿ ನಿಮ್ಮ ಆಯ್ಕೆ ತಪ್ಪಾಗಿರುತ್ತದೆ. ಏಕೆಂದರೆ, ನೀವು ಕತ್ತಲೆಯಲ್ಲಿ ತಡಕಾಡುತ್ತಿದ್ದೀರಿ.
ನೀವು ಯಾರೆಂಬುದೇ ನಿಮಗೆ ತಿಳಿದಿಲ್ಲದಿರುವಾಗ, ಬೇರೊಬ್ಬರನ್ನು ಹೇಗೆ ಆಯ್ಕೆ ಮಾಡಬಲ್ಲಿರಿ? ಸತ್ಯವೆಂದರೇನು ಎನ್ನುವುದೇ ನಿಮಗೆ ತಿಳಿದಿಲ್ಲದಿರುವಾಗ, ಗುರುವನ್ನಾಗಿ ಯಾರನ್ನು ಆಯ್ಕೆ ಮಾಡಿಕೊಳ್ಳಬೇಕು? ಯಾರನ್ನು ಹೇಗೆ ಅಳೆಯಬಲ್ಲಿರಿ? ನೀವು ಯಾವುದನ್ನು ಸರಿಯೆಂದು ನಿರ್ಣಯಿಸುತ್ತೀರೋ, ಅದು ತಪ್ಪಾಗುವ ಸಾಧ್ಯತೆಯೇ ಹೆಚ್ಚು.

ನಾನು ಇದನ್ನು ಯಾವುದೇ ಷರತ್ತಿಲ್ಲದೆ ಹೇಳುತ್ತೇನೆ: ಇಲ್ಲಿ ಯಾವುದೋ ಒಂದು ಆಯ್ಕೆ ತಪ್ಪಾಗಬಹುದು, ಮತ್ತೊಂದು ಸರಿಯಾಗಿರಬಹುದು ಎನ್ನುವ ಪ್ರಶ್ನೆ ಇಲ್ಲ. ಇಲ್ಲ! ನೀವು ಏನನ್ನೇ ಆಯ್ಕೆ ಮಾಡಿಕೊಂಡರೂ, ಅದು ತಪ್ಪಾಗಿರುತ್ತದೆ. ಏಕೆಂದರೆ, ನೀವು ಇನ್ನೂ ಅಜ್ಞಾನದ ಕತ್ತಲೆಯಲ್ಲಿದ್ದೀರಿ. ಯಾವುದನ್ನು ಸರಿಯೆಂದು ನಿರ್ಣಯಿಸಬೇಕು ಎನ್ನುವುದನ್ನು ತಿಳಿಸುವ ಅಂತರಂಗದ ಬೆಳಕು ನಿಮ್ಮಲ್ಲಿ ಇನ್ನೂ ಮೂಡಿಲ್ಲ.

ನಿಮ್ಮಲ್ಲಿ ಯಾವುದೇ ಮಾನದಂಡವಿಲ್ಲ; ಸತ್ಯವನ್ನು ಪರೀಕ್ಷಿಸಿ ತಿಳಿಯುವ ಕಲ್ಲು ಕೂಡ ನಿಮ್ಮಲ್ಲಿಲ್ಲ. ಯಾವುದು ಚಿನ್ನ, ಯಾವುದು ಚಿನ್ನವಲ್ಲ ಎನ್ನುವುದನ್ನು ಗುರುತಿಸುವ ಸಾಮರ್ಥ್ಯ ನಿಮಗಿಲ್ಲ. ಒಬ್ಬ ಪ್ರಾಮಾಣಿಕ ಸಾಧಕನು ಗುರುವಿಗೆ ತನ್ನ ಸಹಜ ರೀತಿಯಲ್ಲಿ ಇರಲು ಅವಕಾಶ ನೀಡುತ್ತಾನೆ. ಗುರು ತನ್ನನ್ನು ಆಯ್ಕೆ ಮಾಡಿಕೊಳ್ಳಲು ಅವನು ಮುಕ್ತ ಮನಸ್ಸಿನಿಂದ ಅವಕಾಶ ನೀಡುತ್ತಾನೆ.

ಆದರೆ ಮೂರ್ಖ ಸಾಧಕನು ಗುರುವನ್ನೇ ಆಯ್ಕೆ ಮಾಡಲು ಪ್ರಯತ್ನಿಸುತ್ತಾನೆ. ಹೀಗೆ ಮಾಡಿದಾಗ, ಆರಂಭದಿಂದಲೇ ಸಮಸ್ಯೆಗಳು ಹುಟ್ಟಿಕೊಳ್ಳುತ್ತವೆ… ಶಿಷ್ಯನೇ ಗುರುವನ್ನಾಗಿ ಆಯ್ಕೆ ಮಾಡಿಕೊಂಡಾಗ, ಅವನಲ್ಲಿ ಒಂದು ರೀತಿಯ ಆಕ್ರಮಣಶೀಲತೆ ಇರುತ್ತದೆ. ಏಕೆಂದರೆ, ಆ ಆಯ್ಕೆಯಲ್ಲಿಯೇ ಆಕ್ರಮಣಶೀಲತೆ ಆರಂಭವಾಗುತ್ತದೆ.
ಆದರೂ, ಗುರು ನಿಮ್ಮನ್ನು ತಿರಸ್ಕರಿಸಲಾರನು. ನೀವು ಅವನನ್ನೇ ಆಯ್ಕೆ ಮಾಡಿಕೊಂಡಿದ್ದರೂ ಸಹ, ತನ್ನ ಕರುಣೆಯಿಂದಾಗಿ ಅವನು ನಿಮ್ಮನ್ನು ನಿರಾಕರಿಸಲಾರನು.”