ಮೂಲ: ಲಾವೋ ತ್ಸು | ಕನ್ನಡಕ್ಕೆ : ಚಿದಂಬರ ನರೇಂದ್ರ
ಒಳ್ಳೆಯತನ
ಎಷ್ಟು ಒಳ್ಳೆಯದಾಗಬಲ್ಲದು
ಎಂಬುದಕ್ಕೆ
ನೀರು, ಒಂದು ಉತ್ತಮ ಉದಾಹರಣೆ
~
ಜಗತ್ತಿನ ಪ್ರತೀ ಜೀವವನ್ನು
ಬೆಳೆಸುತ್ತದೆಯಾದರೂ
ನೀರು, ಎಂದೂ ಯಾವದನ್ನೂ
ಕ್ಲೇಮ್ ಮಾಡಿಲ್ಲ.
ಎತ್ತರದಲ್ಲಿ ಹುಟ್ಟಿದರೂ
ಜನ ಹೆದರುವ,
ಬಾಳಲು ನಾಚುವ ತಗ್ಗುಗಳಲ್ಲೂ
ನಿರಾತಂಕವಾಗಿ ಮನೆ ಮಾಡುತ್ತದೆ
ಇದು ಪಕ್ಕಾ ತಾವೋ ಸ್ವಭಾವ.
~
ನೀರು
ಸೂಕ್ಷ್ಮದಲ್ಲಿ ನುಗ್ಗುತ್ತದೆ
ಆಳದಲ್ಲಿ ಇಳಿಯುತ್ತದೆ
ಒಮ್ಮೆ ಅಂತಃಕರಣ, ಒಮ್ಮೊಮ್ಮೆ ಆಗ್ರಹ
ಎಲ್ಲವನ್ನೂ ಒಳಗೊಳ್ಳೋದು
ಅನ್ಯಾಯದ ವಿರುದ್ಧ ಆಕ್ರೋಶ
ಒಗ್ಗಟ್ಟಿನ ಮಾತು
ಚಾಣಾಕ್ಷ ಸಮಯ ಸಾಧಕತನ
ಸೋಗಿಲ್ಲದ ನಡೆ
ಜೀವದ್ರವ, ನುಂಗಲಾರದ ತುತ್ತು
ಸರಳ, ಸಂಕೀರ್ಣ
ಹೀಗೇ ಅಪಾರ ವೈರುಧ್ಯ.
~
ನೀರಿಗೆ
ಸ್ಪರ್ಧೆ ಎಂಬುದೇ ಇಲ್ಲ
ಅದಕ್ಕೆ ತಕರಾರೂ ಇಲ್ಲ.
