ಪಾನೀಯದ ಬುರುಡೆಯನ್ನು ಖಾಲಿ ಮಾಡಿಯೇ ಯಾಕಿಡಬೇಕು?

ಮರುಭೂಮಿಯ ಮಹಾಯೋಗಿನಿ ರಾ-ಉಮ್
ನಭಾ ಒಕ್ಕುಂದ ಬಿಡಿಸಿದ ಚಿತ್ರ : ಮರುಭೂಮಿಯ ಮಹಾಯೋಗಿನಿ ರಾ-ಉಮ್

ರಾ-ಉಮ್ ಆಶ್ರಮದಲ್ಲಿ ಒಂದು ಕಠಿಣ ನಿಯಮವಿತ್ತು. ಎಲ್ಲರೂ ಇದನ್ನು ಕಟ್ಟುನಿಟ್ಟಾಗಿ ಪಾಲಿಸುತ್ತಿದ್ದರು. ಒಮ್ಮೆ ಬುರುಡೆಗೆ ಪಾನೀಯವನ್ನು ತುಂಬಿಸಿದರೆ, ಅದನ್ನು ಸಂಪೂರ್ಣವಾಗಿ ಮುಗಿಸಿದ ನಂತರವಷ್ಟೇ ಅದನ್ನು ಗೂಡಿನಲ್ಲಿ ಇಡಬಹುದಿತ್ತು. ಅಲ್ಲಿಯ ತನಕವೂ ಬುರುಡೆಯನ್ನು ಕಾಪಾಡುವುದು ಕಡ್ಡಾಯ.

ಇದನ್ನು ಎಲ್ಲರೂ ಸಹಜವಾಗಿಯೇ ಮಾಡುತ್ತಿದ್ದುದರಿಂದ ಈ ನಿಯಮ ಯಾಕಿದೆ ಎಂಬ ಪ್ರಶ್ನೆಯನ್ನು ಯಾರೂ ಕೇಳಿರಲಿಲ್ಲ.

ಉತ್ತರದ ಹಿಮ ಪ್ರದೇಶದ ಊರೊಂದರಿಂದ ಬಂದು ಆಶ್ರಮ ಸೇರಿದ್ದ ಶಿಷ್ಯನಿಗೆ ಈ ನಿಯಮವೇಕಿದೆ ಎಂದು ಅರ್ಥವಾಗಿರಲಿಲ್ಲ. ಉಳಿದವರು ಮಾಡುವುದನ್ನು ನೋಡಿ ತಾನೂ ಅದನ್ನು ಅನುಸರಿಸಿದ. ಆದರೆ ಅವನ ಮನಸ್ಸಿನಲ್ಲಿ ಈ ಪ್ರಶ್ನೆ ಕೊರೆಯುತ್ತಲೇ ಇತ್ತು.

ಹಿರಿಯ ಶಿಷ್ಯರನ್ನು ಕೇಳಿದಾಗ ಅವರು ನಕ್ಕು ಸುಮ್ಮನಾದರೇ ಹೊರತು ಉತ್ತರ ಕೊಡಲು ಮುಂದಾಗಲಿಲ್ಲ. ಮತ್ತಷ್ಟು ಒತ್ತಾಯ ಮಾಡಿದಾಗ, ಅವರು ‘ನಿನಗೆ ಅರ್ಥವಾಗುತ್ತದೆ, ಸ್ವಲ್ಪ ದಿನ ಕಾದು ನೋಡು’ ಎಂದರು.

ತಿಂಗಳುಗಳು ಉರುಳಿದರೂ ಅವನಿಗೆ ಉತ್ತರ ದೊರೆಯಲಿಲ್ಲ.
ಆದರೆ ಈ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಬೇಕೆಂಬ ಅವನ ಕುತೂಹಲ ಬತ್ತಲಿಲ್ಲ.

ವರ್ಷಗಳು ಉರುಳಿ ಸ್ನಾತಕನಾಗುವ ಹಂತಕ್ಕೆ ತಲುಪಿದ. ತರ್ಕದಲ್ಲಿ ಜಾಣನಾಗಿದ್ದ ಆತ ಮುಂದೆ ಲೌಕಿಕನಾಗಿ ಬದುಕುವ ತೀರ್ಮಾನಕ್ಕೆ ಬಂದ. ಸ್ನಾತಕನಾಗಿ ಆಶ್ರಮಕ್ಕೆ ವಿದಾಯ ಹೇಳುವ ದಿನ ತನ್ನನ್ನು ಕಾಡುತ್ತಿದ್ದ ಪ್ರಶ್ನೆಯನ್ನು ರಾ-ಉಮ್‌ಗೇ ಕೇಳಿಬಿಡೋಣ ಎಂದು ತೀರ್ಮಾನಿಸಿದ.

ಸಂಜೆಯ ಪಾನೀಯ ಸೇವನೆಯ ಹೊತ್ತಿನಲ್ಲಿ ರಾ-ಉಮ್ ಎದುರು ಹೋಗಿ ನಿಂತ. ಅವಳು ಕಣ್ಣಲ್ಲೇ ಪ್ರಶ್ನಿಸಿದಳು. ಅವನು ಕೇಳಿದ, ‘ಬುರುಡೆಗೆ ಒಮ್ಮೆ ಪಾನೀಯವನ್ನು ತುಂಬಿಸಿದ ನಂತರ ಅದನ್ನು ಮುಗಿಸಲೇಬೇಕೆಂಬ ನಿಯಮದ ತರ್ಕವೇನು?’

ರಾ-ಉಮ್‌ಗೆ ಸಿಟ್ಟು ನೆತ್ತಿಗೇರಿತು ‘ಮೂರ್ಖ! ನಿನ್ನ ಬುರುಡೆಯನ್ನು ನೆಲಕ್ಕೆಸೆ’ ಎಂದು ಆದೇಶಿಸಿದಳು.

ಶಿಷ್ಯ ಬುರುಡೆಯಲ್ಲಿದ್ದ ಕೊನೆಯ ಗುಟುಕನ್ನು ಗಂಟಲಿಗಿಳಿಸಿ ಗುರುವಿನ ಆದೇಶವನ್ನು ಪಾಲಿಸಿದ. ಬುರುಡೆ ಒಡೆದು ಚೂರು ಚೂರಾಯಿತು.

ರಾ-ಉಮ್ ಶಾಂತ ಧ್ವನಿಯಲ್ಲಿ ಹೇಳಿದಳು, ‘ಆಶ್ರಮದಲ್ಲಿ ಬೆಕ್ಕುಗಳು ಹೆಚ್ಚು. ಬುರುಡೆಗಳು ಒಡೆಯುತ್ತವೆ!’

ಶಿಷ್ಯ ಆಶ್ರಮದಲ್ಲೇ ಉಳಿದು ಮತ್ತೆ ಅಧ್ಯಯನ ಆರಂಭಿಸಿದ

About ಅರಳಿ ಮರ

ಆಧ್ಯಾತ್ಮ, ವ್ಯಕ್ತಿತ್ವ ವಿಕಸನ ಮತ್ತು ಜೀವನ ಶೈಲಿ

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Google photo

You are commenting using your Google account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s

This site uses Akismet to reduce spam. Learn how your comment data is processed.