ಗುರುವಿನ ಕರುಣೆ ಅದೆಷ್ಟೆಂದರೆ….. ಒಂದು ‘ಹಫೀಜ್’ ಪದ್ಯ

ಗುರುಗಳು,
ಸೃಷ್ಟಿಯ ಸೌಂದರ್ಯವನ್ನೂ,
ಭಗವಂತನ ಅಪರಿಮಿತ,
ಅದ್ಭುತ ಸಾಧ್ಯತೆಗಳನ್ನು
ಬಣ್ಣಿಸತೊಡಗುತ್ತಿದ್ದಂತೆಯೇ
ನಾನು ಹುಚ್ಚೆದ್ದು, ಜೋರಾಗಿ ಹಾಡುತ್ತ 
ಕುಣಿಯಲು ಶುರು ಮಾಡುತ್ತಿದ್ದೆ.
ಈ ಆನಂದ,
ಸಹಿಸಲಸಾಧ್ಯವಾಗಿ
ಕಿಟಕಿ ಹಾರಿಕೊಳ್ಳುತ್ತಿದ್ದೆ,
ಅದೂ ತಲೆ ಕೆಳಗಾಗಿ.

ನನ್ನಂಥ 
ಹುಂಬರ ಸಲುವಾಗಿಯೇ ಗುರುಗಳು
ಒಂದೇ ಮಹಡಿಯ ಮನೆಯಲ್ಲಿ
ವಾಸವಾಗಿದ್ದುದು.

ಅವರ ಈ ಮಮತೆಯ ಕಾರಣಕ್ಕಾಗಿಯೇ
ನಾನು ಕೇವಲ ಹದಿನೇಳು ಬಾರಿ
ಮೂಗು ಮುರಿದುಕೊಂಡಿದ್ದೇನೆ!