ಈ ವಾದದ ಪ್ರಕಾರ, ವಿಶ್ವದಲ್ಲಿರುವ ಈ ಮೂಲಭೂತ ಸ್ಥಿರಾಂಕಗಳು ಜೀವವು ಅಸ್ತಿತ್ವದಲ್ಲಿರಲು ಸಾಧ್ಯವಾಗುವಂತೆ ಅತ್ಯಂತ ನಿಖರವಾಗಿ ಹೊಂದಿಸಲ್ಪಟ್ಟಿವೆ ಎನ್ನುವುದು ಆಶ್ಚರ್ಯಕರ ಸಂಗತಿಯಾಗಿದೆ… । ಸಂಗ್ರಹ – ಅನುವಾದ : ಚಿದಂಬರ ನರೇಂದ್ರ

ಕ್ರಿಸ್ಟೊಫರ್ ಹಿಚೆನ್ಸ್, ದೇವರ ಅಸ್ತಿತ್ವಕ್ಕೆ ನೀಡಲಾಗುವ ವಾದಗಳನ್ನು ಪರಿಶೀಲಿಸಿ, ವಿಶ್ಲೇಷಿಸಿ, ಅವುಗಳನ್ನು ಪ್ರಶ್ನಿಸುವುದರಲ್ಲಿ ತಮ್ಮ ಇಡೀ ಜೀವನವನ್ನು ಕಳೆದವರು. ಆದರೆ ಅವುಗಳಲ್ಲಿ ಒಂದು ವಾದ ಮಾತ್ರ ಅವರಿಗೆ ಅತ್ಯಂತ ಕುತೂಹಲಕಾರಿಯಾಗಿ ಕಂಡಿತು; ಅದನ್ನು ಅವರು ಸುಲಭವಾಗಿ ತಳ್ಳಿಹಾಕಲೂ ಸಾಧ್ಯವಾಗಲಿಲ್ಲ. ಆ ವಾದವನ್ನು “ಫೈನ್-ಟ್ಯೂನಿಂಗ್ ವಾದ” (Fine-Tuning Argument) ಎಂದು ಕರೆಯುತ್ತಾರೆ. ಅದು ಹೀಗಿದೆ:

ಈ ವಿಶ್ವವು ಕೆಲವು ಮೂಲಭೂತ ಸಂಖ್ಯೆಗಳ ಮೇಲೆ ನಿರ್ಮಿತವಾಗಿದೆ ಎಂದು ಕಲ್ಪಿಸಿಕೊಳ್ಳಿ. ಉದಾಹರಣೆಗೆ, ಎಲೆಕ್ಟ್ರಾನ್‌ನ ದ್ರವ್ಯರಾಶಿ, ಗುರುತ್ವಾಕರ್ಷಣೆಯ ಬಲ, ಮತ್ತು ಪರಮಾಣುವಿನ ಒಳಗಿನ ಕಣಗಳನ್ನು ಒಂದಾಗಿ ಹಿಡಿದಿಡುವ ಬಲ. ಈ ಸಂಖ್ಯೆಗಳ ಪ್ರತಿಯೊಂದೂ ಒಂದು ನಿಯಂತ್ರಣ ಚಕ್ರ (dial) ಮೇಲಿರುವ ಮೌಲ್ಯಗಳಂತಿವೆ ಎಂದು ಊಹಿಸಿ.

ನೀವು ಗುರುತ್ವಾಕರ್ಷಣೆಯ ಡಯಲ್ ಅನ್ನು ಕೇವಲ ಅಲ್ಪ ಪ್ರಮಾಣದಲ್ಲಿ ಒಂದೇ ದಿಕ್ಕಿಗೆ ತಿರುಗಿಸಿದರೂ, ನಕ್ಷತ್ರಗಳೇ ರೂಪುಗೊಳ್ಳುವುದಿಲ್ಲ. ಪರಮಾಣುವಿನೊಳಗಿನ ಬಂಧನ ಬಲದ ಮೌಲ್ಯವನ್ನು ಸ್ವಲ್ಪ ಬದಲಿಸಿದರೆ, ಕಾರ್ಬನ್ ಎಂಬ ಮೂಲಧಾತುವೇ ಅಸ್ತಿತ್ವಕ್ಕೆ ಬರುವುದಿಲ್ಲ. ಮತ್ತು, ಖಾಲಿ ಜಾಗದಲ್ಲಿರುವ ಶಕ್ತಿಯ (vacuum energy) ಮೌಲ್ಯವನ್ನು ಸ್ವಲ್ಪ ಬದಲಿಸಿದರೆ, ವಿಶ್ವವು ಸರಿಯಾಗಿ ರೂಪುಗೊಳ್ಳುವ ಮುನ್ನವೇ ಕುಸಿದು ಬೀಳುತ್ತದೆ.

ಹೀಗಾಗಿ, ಈ ವಾದದ ಪ್ರಕಾರ, ವಿಶ್ವದಲ್ಲಿರುವ ಈ ಮೂಲಭೂತ ಸ್ಥಿರಾಂಕಗಳು ಜೀವವು ಅಸ್ತಿತ್ವದಲ್ಲಿರಲು ಸಾಧ್ಯವಾಗುವಂತೆ ಅತ್ಯಂತ ನಿಖರವಾಗಿ ಹೊಂದಿಸಲ್ಪಟ್ಟಿವೆ ಎನ್ನುವುದು ಆಶ್ಚರ್ಯಕರ ಸಂಗತಿಯಾಗಿದೆ.

ಈ ಡಯಲ್‌ಗಳಿಗೆ ಸಾಧ್ಯವಾಗಬಹುದಾದ ಎಲ್ಲಾ ಮೌಲ್ಯಗಳಲ್ಲಿ, ಜೀವವನ್ನು ಉಳಿಸಬಲ್ಲ ವಿಶ್ವವನ್ನು ಸೃಷ್ಟಿಸುವ ಮೌಲ್ಯಗಳು ಬಹುತೇಕ ಇಲ್ಲವೇ ಇಲ್ಲ. ಆದರೂ, ನಮ್ಮ ವಿಶ್ವವು ಅಂತಹ ಅಪರೂಪದ ಮೌಲ್ಯಗಳನ್ನು ಹೊಂದಿದೆ. ಹಾಗಾದರೆ ಪ್ರಶ್ನೆ ಏನೆಂದರೆ: ಈ ಡಯಲ್‌ಗಳನ್ನು ಯಾರಾದರೂ ಹೊಂದಿಸಿದ್ದಾರೆಯೇ? ಇಂತಹ ಸೂಕ್ಷ್ಮ ಹೊಂದಾಣಿಕೆಗೆ (fine-tuning) ಒಬ್ಬ ಹೊಂದಾಣಿಕೆಗಾರನ (fine-tuner) ಅಗತ್ಯವಿದೆಯೇ?

ಹಿಚೆನ್ಸ್ ಎಂದಿಗೂ ದೇವರನ್ನು ನಂಬಲಿಲ್ಲ. ಮತ್ತು ಅನೇಕ ನಾಸ್ತಿಕರು ಈ ಪ್ರಶ್ನೆಗೆ ನೀಡುವ ಉತ್ತರ ಇನ್ನಷ್ಟು ಸಂಖ್ಯೆಗಳ ಮೇಲೆ ಅವಲಂಬಿತವಾಗಿದೆ. ಅದು ಬಹುವಿಶ್ವಗಳ (Multiverse) ಕಲ್ಪನೆ.

ಬಹುಶಃ ನಮ್ಮ ವಿಶ್ವವು ಅಸಂಖ್ಯಾತ ವಿಶ್ವಗಳಲ್ಲಿ ಕೇವಲ ಒಂದು ಹನಿ (bubble) ಮಾತ್ರವಾಗಿರಬಹುದು. ಪ್ರತಿಯೊಂದು ವಿಶ್ವದಲ್ಲೂ ಈ ಡಯಲ್‌ಗಳ ಮೌಲ್ಯಗಳು random ಆಗಿ ಹೊಂದಿಸಲ್ಪಟ್ಟಿರಬಹುದು. ಅವುಗಳಲ್ಲಿ ಜೀವಕ್ಕೆ ಅನುಕೂಲಕರವಾದ ಮೌಲ್ಯಗಳು ಕಾಕತಾಳೀಯವಾಗಿ ದೊರೆತ ವಿಶ್ವದಲ್ಲೇ ನಾವು ಬದುಕುತ್ತಿದ್ದೇವೆ. ಆದರೆ ಇಲ್ಲಿ ಒಂದು ಸಮಸ್ಯೆಯಿದೆ.
ನೀವು ವಿವರಿಸಲಾಗದ ಒಂದು ವಿಶ್ವವನ್ನು ತಪ್ಪಿಸಿಕೊಳ್ಳಲು, ಕಣ್ಣಿಗೆ ಕಾಣದ, ಪರಿಶೀಲಿಸಲಾಗದ ಅನಂತ ವಿಶ್ವಗಳನ್ನು ಕಲ್ಪಿಸಿಕೊಳ್ಳಬೇಕಾಗುತ್ತದೆ.

ಹಾಗಾದರೆ, ಯಾವುದು ಕಡಿಮೆ ಅದ್ಭುತ?
ಒಂದೇ ಒಂದು ವಿಶ್ವವನ್ನು ಉದ್ದೇಶಪೂರ್ವಕವಾಗಿ ಸೃಷ್ಟಿಸಲಾಗಿದೆ ಎನ್ನುವುದೇ ? ಅಥವಾ, ಯಾವುದೇ ಉದ್ದೇಶವಿಲ್ಲದೆ, ಅನಂತ ಸಂಖ್ಯೆಯ ವಿಶ್ವಗಳು ಸೃಷ್ಟಿಸಲ್ಪಟ್ಟಿವೆ ಎನ್ನುವುದೇ? ಇದೇ ಫೈನ್-ಟ್ಯೂನಿಂಗ್ ವಾದವು ನಮ್ಮ ಮುಂದೆ ಇಡುವ ಮೂಲಭೂತ ಪ್ರಶ್ನೆ. ಇದು ದೇವರ ಅಸ್ತಿತ್ವವನ್ನು ಸಾಬೀತುಪಡಿಸುವುದಿಲ್ಲ; ಆದರೆ ವಿಶ್ವವು ಜೀವಕ್ಕೆ ಅನುಕೂಲವಾಗುವಂತೆ ಇಷ್ಟು ನಿಖರವಾಗಿ ಹೊಂದಿಕೊಂಡಿರುವುದನ್ನು ಹೇಗೆ ಅರ್ಥಮಾಡಿಕೊಳ್ಳಬೇಕು ಎಂಬ ಗಂಭೀರ ತಾತ್ವಿಕ ಪ್ರಶ್ನೆಯನ್ನು ಮಾತ್ರ ನಮ್ಮ ಮುಂದೆ ಇಡುತ್ತದೆ.