ಸಂಗ್ರಹ ಮತ್ತು ಅನುವಾದ: ಚಿದಂಬರ ನರೇಂದ್ರ

ಯಾಕೆ ಕೆಲವರು ಆಳವಾದ ತಾತ್ವಿಕ ಪ್ರಶ್ನೆಗಳನ್ನು ಇಷ್ಟಪಡುತ್ತಾರೆ, ಆದರೆ ಇನ್ನೂ ಕೆಲವರಿಗೆ ಇಂಥ ಪ್ರಶ್ನೆಗಳು ಅಷ್ಟೇನೂ ಇಷ್ಟವಿರುವುದಿಲ್ಲ ಯಾಕೆ ?ಕೆಲವರು ಜೀವನ, ಮರಣ, ಸತ್ಯ ಮತ್ತು ಬದುಕಿನ ಅರ್ಥದ ಬಗ್ಗೆ ಮಾತನಾಡಲು ಇಷ್ಟಪಡುತ್ತಾರೆ, ಆದರೆ ಇತರರು ಸಾಕುಪ್ರಾಣಿಗಳು, ರಜೆಗಳು ಅಥವಾ ಕುಟುಂಬದಂತಹ ಹೆಚ್ಚು ಪರಿಚಿತ ವಿಷಯಗಳ ಬಗ್ಗೆ ಮಾತ್ರ ಮಾತನಾಡಲು ಇಷ್ಟಪಡುತ್ತಾರೆ.  ಬಹುಶಃ ಅವರು ಸ್ವಭಾವತಃ ಅಥವಾ ಮೆದುಳಿನ ರೀತಿಯಲ್ಲಿಯೇ ವಿಭಿನ್ನವಾಗಿ ರೂಪುಗೊಂಡಿರಬಹುದು.

ಅಸಂಗತತೆ (Absurdism) ಎನ್ನುವ ತತ್ತ್ವವನ್ನು ಪರಿಗಣಿಸಿ. ಅಬ್ಸರ್ಡಿಸಂ ಹೇಳುವುದೇನೆಂದರೆ, ನಾವು ಅರ್ಥವನ್ನು ಹುಡುಕುವ ಜೀವಿಗಳು, ಆದರೆ ನಾವು ಬದುಕುತ್ತಿರುವ ಜಗತ್ತು ಸ್ವತಃ ಅರ್ಥಶೂನ್ಯವಾಗಿದೆ. ನಾವು ಎಲ್ಲದಕ್ಕೂ ವಿವರಣೆಗಳನ್ನು ಹುಡುಕುತ್ತೇವೆ; ಆದರೆ ಇಡೀ ವಿಶ್ವವೇ ನಮಗೆ ಯಾವುದೇ ಅಂತಿಮ ವಿವರಣೆಯನ್ನು ನೀಡುವುದಿಲ್ಲ. ಆದರೆ ಪ್ರತಿಯೊಬ್ಬರೂ ಇದನ್ನು ತಮ್ಮೊಳಗೆ ಅನುಭವಿಸುವುದಿಲ್ಲ. ಪ್ರತಿಯೊಬ್ಬರೂ ‘ಅರ್ಥವನ್ನು ಹುಡುಕುವ’ ವ್ಯಕ್ತಿಗಳಾಗಿರುವುದಿಲ್ಲ. Søren Kierkegaard, Leo Tolstoy ಅಥವಾ Albert Camus ಅಂಥವರು ಮಾತನಾಡಿದಂತಹ ಅಸ್ತಿತ್ವದ ಕುರಿತ ಆಂತರಿಕ ವೇದನೆ (existential anguish) ಎಲ್ಲರಿಗೂ ಇರುವುದಿಲ್ಲ.

ಕೆಲವರು ಇಂತಹ ಯಾವುದೇ ಪ್ರಶ್ನೆಗಳಲ್ಲಿ ಸಿಲುಕಿಕೊಳ್ಳದೆ ತಮ್ಮ ಜೀವನವನ್ನು ಸರಳವಾಗಿ ಮುಂದುವರಿಸುತ್ತಾರೆ. ಹಾಗಾದರೆ ಅವರು ಕಡಿಮೆ ‘ಆಳವಾದವರು’ ಅಥವಾ ಕಡಿಮೆ ಬುದ್ಧಿವಂತರೇ?

ಖಂಡಿತವಾಗಿಯೂ ಅಲ್ಲ.

ಬಹುಶಃ ಅವರ ಮೆದುಳು ವಿಭಿನ್ನ ರೀತಿಯಲ್ಲಿ ಕಾರ್ಯನಿರ್ವಹಿಸುತ್ತಿರಬಹುದು.

ನರವಿಜ್ಞಾನದ (Neurology) ದೃಷ್ಟಿಯಿಂದ ನೋಡಿದರೆ, ತತ್ತ್ವಶಾಸ್ತ್ರದ ವಿವಿಧ ಆಯಾಮಗಳನ್ನು ವಿವರಿಸಲು ಸಹಾಯ ಮಾಡುವ ಮೆದುಳಿನ ಹಲವು ಭಾಗಗಳನ್ನು ನಾವು ಗುರುತಿಸಬಹುದು.

ಉದಾಹರಣೆಗೆ, Dorsolateral Prefrontal Cortex ಅನ್ನು ಗಮನಿಸಿದರೆ, ನಾವು ಹೇಗೆ ತಾರ್ಕಿಕವಾಗಿ, ನಿರ್ದಿಷ್ಟ ಗುರಿಯನ್ನು ಇಟ್ಟುಕೊಂಡು ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತೇವೆ ಮತ್ತು ನಮ್ಮ ಆಲೋಚನೆಗಳು ಹಾಗೂ ಕ್ರಿಯೆಗಳ ಮೇಲೆ ಬೌದ್ಧಿಕ ನಿಯಂತ್ರಣವನ್ನು (cognitive control) ಹೇಗೆ ಸಾಧಿಸುತ್ತೇವೆ ಎನ್ನುವುದನ್ನು ಅರ್ಥಮಾಡಿಕೊಳ್ಳಬಹುದು.

ಅದೇ ರೀತಿ, ‘ಥಿಯರಿ ಆಫ್ ಮೈಂಡ್’ ಗೆ ಸಂಬಂಧಿಸಿದ ಮೆದುಳಿನ ಭಾಗಗಳನ್ನು,  ಉದಾಹರಣೆಗೆ ಪ್ರೀಫ್ರಂಟಲ್ ಕಾರ್ಟೆಕ್ಸ್‌ನ ಕೆಲವು ಪ್ರದೇಶಗಳನ್ನು, ನಾವು ಬಳಸುತ್ತೇವೆ. ನಾವು ವಿಚಾರಗಳನ್ನು ಚರ್ಚಿಸುವಾಗ ಅಥವಾ ವಾದಿಸುವಾಗ, ‘ನನಗೆ ಗೊತ್ತಿಲ್ಲ’ ಎಂಬ ಸ್ಥಿತಿಯಲ್ಲಿಯೇ ಸುಮ್ಮನೆ ಇರಲು ಕೆಲವರಿಗೆ ಸಾಧ್ಯವಾಗುವಂತೆ ಮಾಡುವ ಮೆದುಳಿನ ಒಂದು ವ್ಯವಸ್ಥೆಯೂ ಇದೆ.

ಇವೆಲ್ಲದರ ಅರ್ಥ ನೀವು ಹುಟ್ಟಿನಿಂದಲೇ ತತ್ತ್ವಜ್ಞಾನಿಯಾಗಿದ್ದೀರಿ ಅಥವಾ ಅಲ್ಲ ಎಂಬುದಲ್ಲ.
ಎಲ್ಲ ವಿಷಯಗಳಂತೆಯೇ, ನಮ್ಮ ವ್ಯಕ್ತಿತ್ವವೂ ನಮ್ಮ ವಂಶವಾಹಕ ಗುಣಗಳು (genes) ಮತ್ತು ನಮ್ಮ ಪರಿಸರ, ಈ ಎರಡರ ಸಂಯೋಜನೆಯಾಗಿದೆ.
ಇದರ ಅರ್ಥ ಇಷ್ಟೇ:

ತತ್ತ್ವಜ್ಞಾನಿಗಳು ‘ಮಾನವ ಸ್ವಭಾವ’ (human nature) ಎಂದು ಮಾತನಾಡುವಾಗ, ಬಹುಶಃ ಅವರು ಎಲ್ಲಾ ಮಾನವರ ಬಗ್ಗೆ ಮಾತನಾಡುತ್ತಿಲ್ಲ; ಬದಲಾಗಿ, ಒಂದು ನಿರ್ದಿಷ್ಟ ರೀತಿಯ ಮಾನವರ ಬಗ್ಗೆ ಮಾತ್ರ ಮಾತನಾಡುತ್ತಿರಬಹುದು.

*******************************