ಕನ್ನಡಿಯು ಖಾಲಿಯಾಗಿದೆ; ಅದು ಯಾವುದನ್ನೂ ಪ್ರತಿಬಿಂಬಿಸುತ್ತಿಲ್ಲ. ಅದು ನೀವೇ…. ~ ಓಶೋ / The hidden splendour । ಸಂಗ್ರಹ – ಅನುವಾದ : ಚಿದಂಬರ ನರೇಂದ್ರ

ನೀವು ಮಾತ್ರವಲ್ಲ, ಪ್ರತಿಯೊಬ್ಬರೂ ನೆನಪಿನಲ್ಲಿ ಇಟ್ಟುಕೊಳ್ಳಬೇಕಾದ ಅತ್ಯಂತ ಮೂಲಭೂತವಾದ ಸಂಗತಿಗಳಲ್ಲಿ ಒಂದು ಏನೆಂದರೆ, ನಿಮ್ಮ ಅಂತರ್ಯಾತ್ರೆಯಲ್ಲಿ ನೀವು ಏನೇ ಎದುರಿಸಿದರೂ, ನೀವು ಅದಲ್ಲ. ಅದನ್ನು ಸಾಕ್ಷಿಯಾಗಿ ಗಮನಿಸುತ್ತಿರುವವರು ಮಾತ್ರ ನೀವು. ಅದು ಶೂನ್ಯತೆಯಾಗಿರಬಹುದು, ಆನಂದಮಯ ಸ್ಥಿತಿಯಾಗಿರಬಹುದು, ಮೌನವಾಗಿರಬಹುದು. ಆದರೆ ಒಂದು ಸಂಗತಿಯನ್ನು ನೆನಪಿನಲ್ಲಿ ಇಟ್ಟುಕೊಳ್ಳಬೇಕು: ನೀವು ಎದುರಿಸುವ ಅನುಭವ ಅದು ಎಷ್ಟೇ ಸುಂದರವಾಗಿರಲಿ, ಎಷ್ಟೇ ಮೋಹಕವಾಗಿರಲಿ, ನೀವು ಆ ಅನುಭವವಲ್ಲ. ಆ ಅನುಭವವನ್ನು ಪಡೆಯುತ್ತಿರುವವರು ನೀವು.

ನೀವು ನಿರಂತರವಾಗಿ, ಮತ್ತಷ್ಟು ಆಳವಾಗಿ ಸಾಗುತ್ತಾ ಹೋದರೆ, ಆ ಯಾತ್ರೆಯ ಅಂತಿಮ ಘಟ್ಟವೆಂದರೆ, ಅಲ್ಲಿ ಯಾವುದೇ ಅನುಭವವೂ ಉಳಿಯದಿರುವ ಸ್ಥಿತಿ. ಮೌನವೂ ಇಲ್ಲ, ಆನಂದವೂ ಇಲ್ಲ, ಶೂನ್ಯತೆಯೂ ಇಲ್ಲ. ನಿಮ್ಮ ಮುಂದೆ ವಸ್ತುವಿನ ರೂಪದಲ್ಲಿ ಏನೂ ಇರುವುದಿಲ್ಲ; ಉಳಿಯುವುದು ನಿಮ್ಮ ಸಾಕ್ಷಿ-ಚೈತನ್ಯ ಮಾತ್ರ. ಕನ್ನಡಿಯು ಖಾಲಿಯಾಗಿದೆ; ಅದು ಯಾವುದನ್ನೂ ಪ್ರತಿಬಿಂಬಿಸುತ್ತಿಲ್ಲ. ಅದು ನೀವೇ.

ಅಂತರಂಗದ ಲೋಕದಲ್ಲಿ ಮಹಾನ್ ಯಾತ್ರೆಗಳನ್ನು ಕೈಗೊಂಡವರೂ ಸಹ ಸುಂದರವಾದ ಅನುಭವಗಳಲ್ಲಿ ಸಿಲುಕಿಕೊಂಡಿದ್ದಾರೆ. ಆ ಅನುಭವಗಳೊಂದಿಗೆ ತಮ್ಮನ್ನು ತಾವು ಗುರುತಿಸಿಕೊಂಡು, “ನಾನು ನನ್ನನ್ನು ಕಂಡುಕೊಂಡಿದ್ದೇನೆ” ಎಂದು ಭಾವಿಸಿದ್ದಾರೆ. ಎಲ್ಲ ಅನುಭವಗಳೂ ಕಣ್ಮರೆಯಾಗುವ ಅಂತಿಮ ಹಂತವನ್ನು ತಲುಪುವ ಮೊದಲೇ ಅವರು ನಿಂತುಬಿಟ್ಟಿದ್ದಾರೆ.

ಜ್ಞಾನೋದಯ ಎನ್ನುವುದು ಒಂದು ಅನುಭವವಲ್ಲ.

ನೀವು ಸಂಪೂರ್ಣವಾಗಿ ಏಕಾಂಗಿಯಾಗಿ ಉಳಿಯುವ ಸ್ಥಿತಿಯೇ ಅದು. ಅಲ್ಲಿ ತಿಳಿದುಕೊಳ್ಳಲು ಏನೂ ಇರುವುದಿಲ್ಲ. ಎಷ್ಟೇ ಸುಂದರವಾಗಿದ್ದರೂ ಯಾವುದೇ ವಸ್ತುವೂ ಅಲ್ಲಿ ಇರುವುದಿಲ್ಲ. ಆ ಕ್ಷಣದಲ್ಲಿ ಮಾತ್ರ, ಯಾವುದೇ ವಸ್ತುವಿನಿಂದಲೂ ಅಡೆತಡೆಯಿಲ್ಲದ ನಿಮ್ಮ ಚೈತನ್ಯವು ತನ್ನ ದಿಕ್ಕನ್ನು ಬದಲಿಸಿಕೊಂಡು ತನ್ನ ಮೂಲದ ಕಡೆಗೆ ಹಿಂದಿರುಗುತ್ತದೆ. ಅದು ಆತ್ಮಸಾಕ್ಷಾತ್ಕಾರವಾಗುತ್ತದೆ; ಅದು ಜ್ಞಾನೋದಯವಾಗುತ್ತದೆ.